Då Jon Fosse flytte inn i Grotten i 2011 hadde han ikkje lese meir av Henrik Wergeland enn litteraturinteresserte nordmenn flest. Då han gjekk i gang med å lese meir både om og av den tidlegare Grottebuaren, vart han imponert over kor uhorveleg mykje Wergeland hadde skrive. Fosse feste seg særleg ved lyrikken til Wergeland. Han las og noterte sitat og anna i margen attmed dikta til Wergeland. Desse notata er utgangspunktet for denne samlinga med dikt. Fosse har skrive eigne dikt ut frå det han har teke med seg frå lyrikken til Wergeland. Ein finn noko frå Wergeland i alle dikta som her er samla, hulter til bulter, frå fleire dikt til eitt dikt, lite eller nesten ingenting i eit anna.