Igjen har Magnhild Bruheim tatt fatt i eit aktuelt tema når ho skriv til og om ungdom. Denne gongen er det rykte og kva som eigentleg er sant det er snakk om.
Linn er hovudpersonen i boka. Ho er på fest, og på denne festen vert ei i klassen, Hanna valdteke. Eller vert ho det? Ho seier det i alle fall sjølv, men ikkje alt stemmer. Det blir ikkje enklare for Linn når han som vert skulda for valdtekta er Sander, som ho er forelska i. Solveig, bestevenninna til Linn vil aksjonere til støtte for Hanna. Ho vil ikkje høyre snakk om at det kanskje ikkje er heilt sant det Hanna fortel. Her er det duka for konflikter, ryktespreiing, baksnakking og utestenging.
Passar for gutar og jenter frå 14 år.